Libuše Dvořáková kaj Věra Barandovská-Frank honorigitaj dum la 110-a UKo en Brno

Elstara Agado

Nisinaga Atusi “Acero” (Japanio) pro elstara agado kiel kunordiganto de la Komisiono de UEA pri Azia-Oceania Movado), interalie pro efika subteno al la okazigo de 10-a Azia-Oceania Kongreso (AOK), kaj pro la longtempa agado por Esperanto en Japanio, interalie kiel vicprezidanto de Japana E-Instituto.

Henriel Fidilalao (Madagaskaro) pro la aktiva laboro pri disvastigo de Esperanto en Madagaskaro, interalie per prizorgado de la reta Aminda Radio Esperanto, kiu elsendiĝis jam 153-foje, kaj la monata revuo Panoramo de la Granda Insulo.

John (Xiaolong) Huang (Kanado) pro la elstara aktivado kadre de Internacia Komerca kaj Ekonomia Federacio (IKEF), kiel prezidanto de IKEF Nordameriko, ĉefredaktoro de la revuo La Merkato, organizanto de ĉiu-dimanĉa reta kunveno. Krome li estas oficiala fotisto de UK ekde 2022.

Françoise (Fransoazo) Noireau (Francio) pro la elstara agado pri instruado de Esperanto en Afriko per la reto (Vacapo) kaj kunordigo de 16 instruistoj, plimulte afrikaj, kadre de kunlaboro kun la Universitato Espero en Barako, D R. Kongo

Libuše Dvořáková (Ĉeĥio) pro longjara prizorgado de la Esperanto-Muzeo en Svitavy.

Věra Barandovská-Frank (Germanio/Ĉeĥio), ĉi-jara rektoro de Internacia Kongresa Universitato (IKU – resumojn de la ĉefaj prelegoj vidu ĉi-tie), pro la multjara lingvistika agado kunlabore kun la edzo Helmar Frank pri Akademio Internacia de la Sciencoj (AIS), longtempa instruado en Poznano kaj verkado de ĉ. 130 sciencaj publikaĵoj.

Elstara Arta Agado

Bobelarto (Hungario/Kanado) pro la elstara kontribuo al la literatura agado en Esperanto, interalie per organizado de Internacia Novelo-Konkurso (INK), literatura duonmaratono, verksesioj kaj legosalonoj.

Elkorajn gratulojn!

mm, pd

fonto: Gazetaraj Komunikoj de UEA n-ro 1246