Aktuale pri preparado de la unua Internacia lernejo de Esperanto

Kiel vi verŝajne jam scias de sekcio „Aranĝoj“ en nia retejo, de la 8-a ĝis la 11-a de novembro okazos la unua Internacia lernejo de Esperanto en kastelo Bartošovice. Kio novas ĉi-rilate? Bv. legi plu!

Presraporto

Laŭ konfeso de la vilaĝestrino, esprimita dum la lasta renkontiĝo, ĉiuj ĝojas pri nia Esperanta lernejo. Ŝi persone bonvenigos la partoprenantojn en la kastelo, kaj permesis planti novan Esperantan arbon en la kastela parko, kiu estas parto de la natura rezervejo Poodří, kaj promesis, ke ŝi mem elektos la taŭgan arbspecon. Direktorino de la baza lernejo bakos por ĉiuj partoprenantoj specialajn moraviajn kukojn „Moravske koláče“ kaj lernantoj de la baza lernejo preparos dum sia metiedukado dekoraĵojn de la klasĉambro, kie okazos Esperantaj kursoj kaj diversajn Esperantajn reklamilojn. La klasĉambro estas ekipita per plurmedia teknologio kaj granda elektronika tuŝtabulo por lingva edukado. Lernantoj de la bazlernejo preparas surprizon por esperantistoj, kaj lernas kelkajn kantojn en Esperanto por la malferma solenaĵo. La organizantoj de la evento proponis, ke ĉiuj lernantoj kaj iliaj instruistoj, kiuj interesiĝos pri Esperanto, povos senpage ĉeesti la lecionojn de Esperanto por komencantoj. Koncerto de la hungara kantistino Anjo Amika okazos en la prestiĝa salono de la kastelo, kaj la vilaĝestrino promesis ekipi la salonon per sonaparataro kaj helpi per vendado de la biletoj. Ni reciproke konsentis, ke ĉiuj bazlernantoj povas viziti la koncerton senpage. Intereson pri la koncerto de Anjo Amika esprimis ankaŭ esperantistoj el la najbara klubo en Gliwice en Pollando. En la bazlernejo okazos ankaŭ ĉiuj prelegoj kaj estos je nia dispono malgranda bufedo por kafumado kaj refreŝiĝo. Sabate posttagmeze ni havos la eblecon partopreni ekskurson al la natura rezervejo, kun fakaj klarigoj, kaj viziton de malsanulejo por rabobirdoj. La plej granda intereso estas pri la instruisto de Esperanto sinjoro Stano Marček, kiu estas eksestro de la muzika grupo TEAM, ĉar ĉiuj lokaj homoj konas ĝin kaj estas fieraj ke li vizitos la vilaĝon. La loka televidstacio Polar el Ostrava promesis kunlaboron. Kaj mi nome de la organiza teamo dankas al ĉiuj, kiuj jam aliĝis al nia Esperanta lernejo.

Pavol Kaščák


  • publikita 9. 10. 2012
  • 860 homoj de tiam tralegis tiun ĉi artikolon
  • paĝon oni povas printi

Komentáře

Bohužel zde zatím nejsou žádné komentáře.

Podělte se o svůj názor

 
Administrace - Aleš Tomeček © 2009-2018